வேங்கைவயல் சம்பவம்… குற்றவாளிகளை நெருங்கும் சிபிசிஐடி.! மேலும் 6 பேருக்கு மரபணு சோதனை.! 

கடந்த வருடம் டிசம்பர் 26ஆம் தேதி, புதுக்கோட்டை மாவட்டம் இறையூரை அடுத்த வேங்கைவயல் கிராமத்தில் பட்டியலின மக்கள் வசிக்கும் பகுதியில் உள்ள குடிநீர் மேல்நிலை தேக்க தொட்டியில் சில விஷமிகள் மனித கழிவுகளை கலந்தனர். பொதுமக்கள் குடிக்கும் தண்ணீரில் மனித கழிவு கலந்த விவகாரம் பெரும் அதிர்வலைகளை ஏற்படுத்தியது.

முதலில் இந்த விவகாரத்தை தமிழ்நாடு காவல்துறை விசாரித்து வந்த நிலையில் , இந்த வழக்கானது சிபிசிஐடி வசம் ஒப்படைக்கப்பட்டது. சிபிசிஐடி போலீசார் தங்கள் விசாரணையை துவங்கி 100க்கும் மேற்பட்டோரிடம் விசாரணை மேற்கொண்டனர். இதுவரை 25 பேரிடம் மரபணு சோதனை மேற்கொள்ளப்பட்டுள்ளது.

அதாவது, மனிதக்கழிவு கலந்த தண்ணீரின் மாதிரியில் உள்ள டிஎன்ஏவை ஒப்பிட்டு பார்த்து அறிவியல் ரீதியிலான ஆதாரங்களை சேகரிக்க சிபிசிஐடி போலீசார் நடவடிக்கை மேற்கொண்டு வருகின்றனர். இந்த வழக்கு விசாரணை விவரங்கள் புதுக்கோட்டை வன்கொடுமை தடுப்பு நீதிமன்றத்தில் தாக்கல் செய்யப்படுகின்றன.

இதனை அடுத்து இறையுரை சேர்ந்த ஒரு சிறுவன் உட்பட 4 பேரிடமும் , வேங்கைவயல் கிராமத்தை சேர்ந்த 2 பேரிடமும் மரபணு சோதனை மேற்கொள்ள வேண்டும் என சிபிசிஐடி போலீசார் நீதிமன்றத்தில் அனுமதி கேட்டு இருந்தனர். தற்போது அதற்கு அனுமதி அளிக்கப்ட்டுள்ளது. இதனை தொடர்ந்து குறிப்பிட்ட 6 நபர்களின் மரபணு சோதனை மேற்கொள்ளப்பட்டு அதன் அறிக்கை நீதிமன்றத்தில் தாக்கல் செய்யப்பட உள்ளது.