அதிமுகவில் இணைகிறார் பாஜகவின் நயினார் நாகேந்திரனின் சகோதரர்!

பாஜக சட்டமன்ற உறுப்பினர் நயினார் நாகேந்திரனின் சகோதரர் நயினார் வீரபெருமாள் அதிமுகவில் இணைய உள்ளதாக கூறப்படுகிறது. தமிழ்நாட்டில் அதிமுக – பாஜக இடையே மோதல் வலுத்துள்ள நிலையில், சென்னை அதிமுக தலைமை அலுவலகத்தில் பொதுச்செயலாளர் எடப்பாடி பழனிசாமி தலைமையில் மாவட்டச் செயலாளர்கள் கூட்டம் நடைபெறுகிறது. அதிமுகவில் ஒரு தரப்பினர் பாஜகவுடன் கூட்டணியைத் தொடர வேண்டும் என்றும் மற்றொரு தரப்பின் கூட்டணியை முறிக்க வேண்டும் எனவும் வலியுறுத்துவதாக கூறப்படுகிறது.

கூட்டணி முறிவு அல்லது கூட்டணி தொடர பாஜகவுக்கு நிபந்தனை விதிப்பது பற்றிய அறிவிப்பு வெளியாக வாய்ப்பு உள்ளது. கூட்டணி இல்லை என ஜெயக்குமார் திட்டவட்டமாகக் கூறும் அதே நேரத்தில், அதிமுக – பாஜக இடையே எந்த பிரச்னையும் இல்லை என செல்லூர் ராஜு பேட்டி அளித்ததால் தொண்டர்கள் மத்தியில் குழப்பம் ஏற்பட்டுள்ளது. இதனால், இன்றைய மாவட்ட செயலாளர்கள் கூட்டத்தில் முடிவு எடுக்கப்படும் என எதிர்பார்க்கப்படுகிறது.

இந்த நிலையில், அதிமுக – பாஜக இடையே மோதல் உச்சமடைந்துள்ள நேரத்தில், தமிழக பா.ஜ.த துணைத் தலைவரும், சட்டமன்றக்குழு தலைவருமான நயினார் நாகேந்திரனின் சகோதரர் நயினார் வீரப்பெருமாள் அதிமுகவில் இணைய உள்ளதாக வெளியான தகவலால் பரபரப்பான சூழல் நிலவுகிறது. இதுபோன்று, தென்காசி முன்னாள் எம்பி வசந்தி முருகேசனும் அதிமுகவில் இணைய உள்ளதாகவும் தகவல் வெளியாகியுள்ளது.