ஏற்றத்துடன் முடிந்த பங்குச்சந்தை..! சென்செக்ஸ் 446 புள்ளிகள் உயர்வு..!

மும்பை பங்குச்சந்தை குறியீட்டு எண் பிஎஸ்இ சென்செக்ஸ் 446.03 புள்ளிகள் உயர்ந்து 63,416 புள்ளிகளில் வர்த்தகம் நிறைவு.

இந்தியப் பங்குச்சந்தை குறியீடுகள் கடந்த வாரம் இதுவரை இல்ல உச்சத்தை எட்டி புதிய சாதனையை படைத்தது. அதனைத்தொடர்ந்து இன்றைய வர்த்தக நாளில் 63,151 புள்ளிகள் எனத் தொடங்கிய சென்செக்ஸ், வர்த்தக நாளின் முடிவில் 446.03 புள்ளிகள் உயர்ந்து 63,416 புள்ளிகளாக வர்த்தகம் நிறைவடைந்துள்ளது.

மேலும், தேசிய பங்குச்சந்தை என்எஸ்இ நிஃப்டி 126.20 புள்ளிகள் அல்லது 0.68% உயர்ந்து 18,817 புள்ளிகளாக வர்த்தகம் நிறைவடைந்துள்ளது. முந்தைய வர்த்தக நாளின் முடிவில் சென்செக்ஸ் 62,970 புள்ளிகளாகவும், நிஃப்டி 18,691 புள்ளிகளாகவும் நிறைவடைந்தது.

கடந்த 7 மாதங்களில் இல்லாத அளவிற்கு அந்நிய முதலீட்டாளர்கள் பங்குச்சந்தையில் ரூ.30,000 கோடிக்கு மேல் முதலீடு செய்திருப்பது மும்பை பங்குச்சந்தை குறியீடுகள் உயர்வுக்கு காரணம் எனக் கூறப்படுகிறது.

பங்குச்சந்தையில் ஏற்பட்ட இந்த மாறுதலால் சென்செக்ஸ் குறியீட்டில் ஸ்டேட் பாங்க் ஆஃப் இந்தியா, ஹவுசிங் டெவலப்மென்ட் ஃபைனான்ஸ் கார்ப்பரேஷன், ஆக்சிஸ் வங்கி, ஹெச்டிஎஃப்சி வங்கி, பார்தி ஏர்டெல் லிமிடெட் உள்ளிட்ட நிறுவனங்களின் பங்குகள் உயர்வுடன் காணப்படுகின்றன.

மாருதி சுசுகி இந்தியா, ஐடிசி லிமிடெட், ஹிந்துஸ்தான் யூனிலீவர் லிமிடெட் ஆகிய 3 நிறுவனங்களின் பங்குகள் சரிவுடன் காணப்படுகின்றன. நிஃப்டி குறியீட்டில் உள்ள 50 நிறுவனங்களின் பங்குகளில், 38 நிறுவனங்கள் லாபமும், 12 நிறுவனங்கள் நஷ்டமும் அடைந்துள்ளன.