முதல் வெற்றியை பதித்த திருப்பூர் தமிழன்ஸ்..! 7 விக்கெட் வித்தியாசத்தில் அதிரடி..!

டிஎன்பிஎல் தொடரின் இன்றைய NRK vs ITT போட்டியில், திருப்பூர் தமிழன்ஸ் அணி 7 விக்கெட் வித்தியாசத்தில் வெற்றி பெற்றது.

7-வது சீசன் டிஎன்பிஎல் தொடரின் இன்றைய போட்டியில் நெல்லை ராயல் கிங்ஸ் மற்றும் ஐட்ரீம் திருப்பூர் தமிழன்ஸ் அணிகள் திண்டுக்கலில் உள்ள என்பிஆர் கல்லூரி கிரிக்கெட் மைதானத்தில் மோதியது. இதில் டாஸ் வென்ற திருப்பூர் தமிழன்ஸ் அணி பந்துவீச்சை தேர்வு செய்தது.

இதன்படி, முதலில் களமிறங்கிய நெல்லை அணி 18.2 ஓவர்களில் அனைத்து விக்கெட்டுகளையும் இழந்து 124 ரன்கள் எடுத்துள்ளது. இதையடுத்து, 125 ரன்கள் எடுத்தால் வெற்றி என்ற இலக்குடன் திருப்பூர் அணியில் முதலில் களமிறங்கிய ராதா கிருஷ்ணன், துஷார் ரஹேஜா ஜோடி நல்லத்தொடக்கம் அமைத்தனர்.

ராதா கிருஷ்ணன் பொறுப்பாக விளையாடிய நிலையில் 34 ரன்களில் ஆட்டமிழக்க, துஷார் ரஹேஜா அரைசதத்தை தவறவிட்டு 49 ரன்களில் வெளியேறினார். இதன்பின், அனிருத் மற்றும் ராஜேந்திரன் விவேக் களமிறங்க, சோனு யாதவ் வீசிய பந்தில் 21 ரன்களுடன் விவேக் ஆட்டமிழந்தார்.

முடிவில், திருப்பூர் அணி 18.2 ஓவர்களில் 3 விக்கெட்டுகளை இழந்து 128 ரன்கள் எடுத்த நிலையில், 7 விக்கெட் வித்தியாசத்தில் நெல்லை அணியை வென்றது. இதனால் தொடரின் முதல் வெற்றியை பதிவு செய்தது. இதில் அதிகபட்சமாக துஷார் ரஹேஜா 49 ரன்களும், ராதா கிருஷ்ணன் 34 ரன்களும், விவேக் 21 ரன்களும் குவித்துள்ளனர். நெல்லை அணியில் சோனு யாதவ் 2 விக்கெட்டுகளை வீழ்த்தினர்.