IPL RRvsDC: ஜெய்ஸ்வால், பட்லர் அதிரடி பேட்டிங்; ராஜஸ்தான் அணி 199 ரன்கள் குவிப்பு.!

ஐபிஎல் தொடரின் இன்றைய RR-DC போட்டியில் ராஜஸ்தான் அணி முதலில் பேட் செய்து அதிரடியாக விளையாடி 199/4 ரன்கள் குவிப்பு. 

16-வது ஐபிஎல் தொடரின் இன்றைய போட்டியில் ராஜஸ்தான் ராயல்ஸ் மற்றும் டெல்லி கேபிட்டல்ஸ் அணிகள் கவுகாத்தியில் விளையாடுகிறது. இதில் டாஸ் வென்ற டெல்லி அணி முதலில் பந்துவீச்சை தேர்வு செய்தது. இதன்படி ராஜஸ்தான் அணி முதலில் பேட்டிங்கில் களமிறங்கியது.

தொடக்க வீரர்களான பட்லர் மற்றும் ஜெய்ஸ்வால் இருவரும் ராஜஸ்தான் அணிக்கு அதிரடி தொடக்கத்தை அமைத்து கொடுத்தனர். டெல்லியின் பந்துவீச்சை நாலாபுறமும் பவுண்டரிகள், சிக்ஸர்கள் என அடித்து நொறுக்கினர்.

ஜெய்ஸ்வால் அரைசதம் அடித்த நிலையில் 60 ரன்களில் ஆட்டமிழந்தார். அதன்பிறகு களமிறங்கிய சாம்சன் முதன்முறையாக இந்த தொடரில் டக் அவுட் ஆகி வெளியேறினார். ஒருபுறம் பட்லர் அடித்து ஆடி அரைசதம் கடந்தார். சதமடிப்பார் என எதிர்பார்க்கப்பட்ட நிலையில் பட்லர் 79 ரன்களில் முகேஷ் குமார் பந்தில் விக்கெட்டை பறிகொடுத்தார்.

கடைசியாக இறங்கிய ஜுரேல், ஹெட்மயருக்கு(39* ரன்கள்) துணையாக அதிரடி காட்ட ராஜஸ்தான் அணி 20 ஓவர்களில் 4 விக்கெட் இழப்புக்கு 199 ரன்கள் குவித்தது. டெல்லி அணி சார்பில் முகேஷ் குமார் 2 விக்கெட்களை வீழ்த்தினார்.