மின்னல் தாக்கியதால் பரிதாபம்..! 11 வயது சிறுமி உட்பட 2 பேர் பலி..!

அசாமில் மின்னல் தாக்கியதால் 11 வயது சிறுமி உட்பட இரண்டு பேர் உயிரிழந்தனர். 

அசாம் மாநிலத்தின் பல்வேறு பகுதிகளில் இடியுடன் கூடிய மழை பெய்து கொண்டிருந்தது. அந்த மழையில் திடீரென ஏற்பட்ட மின்னல் தாக்கி தர்ராங் மாவட்டத்தின் கர்போரி கிராமத்தில் 60 வயதான மஜூருதீன் என்ற நபர் உயிரிழந்துள்ளார். இவரைத்தொடர்ந்து குவஹாத்தியின் சத்கான் பகுதியில் 11 வயதான மம்தா பேகம் என்ற சிறுமியும் மின்னல் தாக்கியதால் உயிரிழந்ததாக அசாம் மாநில பேரிடர் மேலாண்மை ஆணையம் (ASDMA) தெரிவித்துள்ளது

குவஹாத்தி பிராந்திய வானிலை ஆய்வு மையம் வெளியிட்டுள்ள எச்சரிக்கையின்படி, அடுத்த இரண்டு நாட்களில் கவுகாத்தியில் ஓரிரு இடங்களில் லேசானது முதல் மிதமான இடியுடன் கூடிய ஆலங்கட்டி மழை பெய்யக்கூடும் என்றும் இந்த காலகட்டத்தில் மாநிலத்தின் பல்வேறு பகுதிகளில் மழை பெய்யும் என்றும் தெரிவிக்கப்பட்டுள்ளது.

மேலும் அஸ்ஸாம், மேகாலயா, நாகாலாந்து, மணிப்பூர், மிசோரம் மற்றும் திரிபுரா ஆகிய மாநிலங்களுக்கு மார்ச் 17 ஆம் தேதி வரை மழை மற்றும் இடியுடன் கூடிய மழை பெய்ய இருப்பதால் ஆரஞ்சு எச்சரிக்கை விடுக்கப்பட்டுள்ளதாக இந்திய வானிலை ஆய்வு மையம் (IMD) அறிவித்துள்ளது.