விவசாயிகளுக்கு வட்டியில்லா கடன், இலவச மின்சாரம் – ராஜஸ்தான் முதல்வர் அறிவிப்பு

2023-24 ஆம் ஆண்டுக்கான பட்ஜெட் தாக்கலின்போது, தற்செயலாக பழைய பட்ஜெட்டை வாசித்த ராஜஸ்தான்  முதல்வர் அசோக் கெலாட்.

ராஜஸ்தானில் பட்ஜெட் தாக்கல் – வட்டியில்லா கடன்:

ராஜஸ்தானில் இந்தாண்டு இறுதியில் சட்டமன்றத் தேர்தல் நடைபெற இருக்கும் நிலையில், ராஜஸ்தானில் காங்கிரஸ் தலைமையிலான அரசு இன்று இந்த ஆண்டுக்கான மாநில பட்ஜெட்டை தாக்கல் செய்தது. பட்ஜெட் தாக்கலின்போது, பட்ஜெட்டை வாசித்த முதல்வர் அசோக் கெலாட், பல்வேறு சலுகைகள் மற்றும் முக்கிய அறிவிப்புகளை வெளியிட்டார். அதில், இந்த ஆண்டுக்கான மாநில பட்ஜெட்டின் ஒரு பகுதியாக, மாநிலம் முழுவதும் உள்ள விவசாயிகளுக்கு கூட்டுறவு வங்கிகளில் இருந்து ரூ.3,000 கோடி வட்டியில்லா கடன் வழங்கப்படும் என்று அறிவித்தார்.

விவசாயிகளுக்கு இலவச மின்சாரம்:

மேலும் விவசாயிகளுக்கு 2,000 யூனிட் இலவச மின்சாரம் வழங்கப்படும் என்றும் விவசாயிகளுக்கு வீட்டுக்கடன்களில் 5% கடன் மானியம் வழங்கப்படும் எனவும் அசோக் கெலாட் அறிவித்தார். இதுமட்டுமில்லாமல், ராஜஸ்தானில் மாதந்தோறும் வீட்டு உபயோக மின்சாரம் 100 யூனிட் இலவசமாக வழங்க முடிவு செய்யப்பட்டுள்ளது. ஏற்கனவே, 50 யூனிட் மின்சாரம் இலவசமாக வழங்கி வந்த நிலையில், தற்போது 100 யூனிட்டாக அதிகரிக்கப்பட்டுள்ளது.

வரியில்லா பட்ஜெட்:

இந்த குறிப்பாக பட்ஜெட்டில் புதிதாக எந்த ஒரு வரியும் அறிவிக்கப்படவில்லை என அம்மாநில முதல்வர் அசோக் கெலாட் தெரிவித்துள்ளது முக்கியத்துவம் பெறுகிறது. கடந்த 4 பட்ஜெட்டுகளிலும் எந்த ஒரு வரியும் மக்களுக்கு விதிக்கப்படவில்லை. மக்களுக்கு இதன் மூலம் வரி செலுத்துவதிலிருந்து சலுகை அளிக்கப்பட்டுள்ளது என்றார்.

பழைய பட்ஜெட்டை வாசித்த ராஜஸ்தான் முதல்வர்:

இதனிடையே, ராஜஸ்தான் சட்டமன்றத்தில் நடைபெற்ற 2023-24 ஆம் ஆண்டுக்கான பட்ஜெட் தாக்கலின்போது, பட்ஜெட்டை வாசித்த முதல்வர் அசோக் கெலாட் தற்செயலாக பழைய பட்ஜெட்டை வாசித்தது பேசும் பொருளாக மாறியுள்ளது. அசோக் கெலாட், சுமார் 8 நிமிடங்கள் பழைய பட்ஜெட்டையே வாசித்துக்கொண்டிருக்க, உடனடியாக தலைமைச் செயலாளர் அதனைச் சுட்டிக்காட்டி நிறுத்தியுள்ளார்.

எதிர்க்கட்சிகள் அமளி:

இதனால் பா.ஜ.க எம்.எல்.ஏ-க்கள் அவையில் கூச்சல் போட்டு அமளியில் ஈடுபடத் தொடங்கினர். இதன் காரணமாக சுமார் 30 நிமிடங்களுக்கு அவை ஒத்திவைக்கப்பட்டது. பின்னர் பட்ஜெட்டை தாக்கல்செய்த அசோக் கெலாட், இது தவறுதலாக நடந்துவிட்டது. அதற்காக நான் வருந்துகிறேன் என்றும் தெரிவித்தார். இதனைத்தொடர்ந்து, பட்ஜெட் உரையில் பல்வேறு அறிவிப்புகளை வெளியிட்டார் என்பது குறிப்பிடத்தக்கது.