இன்று மத்திய பட்ஜெட் தாக்கல்..! 12 நாள் நாடு தழுவிய பிரச்சாரத்தை முன்னெடுக்க பாஜக திட்டம்!

2023 பட்ஜெட்டை முன்னிலைப்படுத்த பாஜக 12 நாள் நாடு தழுவிய பிரச்சாரத்தைத் திட்டமிட்டுள்ளது.

2023-24-ஆம் நிதியாண்டுக்கான மத்திய பட்ஜெட்டை இன்று நிதியமைச்சர் நிர்மலா சீதாராமன் நாடாளுமன்ற மக்களவையில் தாக்கல் செய்கிறார். இன்று காலை 11 மணிக்கு மக்களவையில் 2023-24-ஆம் ஆண்டுக்கான நிதிநிலை அறிக்கையை தாக்கல் செய்யப்பட உள்ளது.

அடுத்த ஆண்டு நாடாளுமன்ற தேர்தல் நடக்க உள்ள நிலையில், பாஜக ஆட்சியில் நிதியமைச்சர் நிர்மலா சீதாராமன் தாக்கல் செய்கிற கடைசி முழுமையான பட்ஜெட்டாக இதுவாகும். மேலும், 2024 மக்களவை தேர்தலுக்கு முன் பிரதமர் நரேந்திர மோடி அரசு தாக்கல் செய்யும் இறுதியான முழு ஆண்டு பட்ஜெட் என்பதால் இதன் மீது பெரிய எதிர்பார்ப்பு ஏற்பட்டுள்ளது.

இந்த பட்ஜெட்டில், நீர்மூழ்கிக் கப்பல்கள், ட்ரோன்கள் உள்ளிட்ட பாதுகாப்பு அம்சங்களுக்கு அதிக முக்கியத்துவம்  அளிக்கப்படும் என கூறப்படுகிறது. அதுமட்டுமில்லாமல், அடுத்தாண்டு தேர்தல் வர இருப்பதால் பல்வேறு முக்கிய அறிவிப்புகள், திட்டங்கள் அறிவிக்கப்படும் எனவும் எதிர்பார்க்கபடுகிறது.

இந்த நிலையில், 2023 பட்ஜெட்டை முன்னிலைப்படுத்த பாஜக 12 நாள் நாடு தழுவிய பிரச்சாரத்தைத் திட்டமிட்டுள்ளது. 2023-ஆம் ஆண்டு மத்திய பட்ஜெட்டில் அறிவிக்கப்படும் “மக்கள் சார்பு” நடவடிக்கைகள் குறித்து விழிப்புணர்வை ஏற்படுத்த பாஜக 12 நாள் நாடு தழுவிய பிரச்சாரத்தை தொடங்கும் என்று கட்சித் தலைவர்கள் தெரிவித்துள்ளனர்.

பட்ஜெட் தாக்கல் செய்யப்பட்ட நாளில் தொடங்கும் பிரச்சாரத்தை கட்சியின் மாநிலங்களவை எம்பி சுஷில் மோடி ஒருங்கிணைப்பார் என்று இதற்காக ஒன்பது பேர் கொண்ட குழு அமைக்கப்பட்டுள்ளது எனவும் தெரிவிக்கப்பட்டுள்ளது என்பது குறிப்பிடத்தக்கது.