தஞ்சை பெரிய கோவில் 1037வது சதய விழா.! ராஜராஜ சோழன் சிலைக்கு மாலை அணிவித்து மரியாதை.!

இன்று தஞ்சை பெரிய கோவிலில் மாமன்னன் ராஜராஜ சோழனுக்கு 1037வது சதய விழா கொண்டாடப்பட்டு வருகிறது. 

தஞ்சை பெரிய கோவில் எனும் பெருவுடையார் கோவிலில் வருடாவருடம் ஐப்பசி மாதம் மாமன்னன் ராஜராஜ சோழன் முடிசூட்டிய தினத்தை கொண்டாடும் வகையில் சதய விழா நடைபெறும்.

அந்த வகையில் கடந்த 2 வருடமாக கொரோனா கட்டுப்பாடுகள் காரணமாக ஒருநாள் மட்டும் சதய விழா நடைபெற்றது. இதில் பக்தர்கள் கலந்துகொள்ள அனுமதிக்கப்படவில்லை.

இந்த வருடம் வழக்கம் போல பிரமாண்டமாக 2 நாள் விழாவாக சதய விழா கொண்டாடப்பட்டு வருகிறது. நேற்று முதல் நாள் பல்வேறு நிகழ்ச்சிகள் நடைபெற்றது.சதய விழா நாளான இன்று தஞ்சையில் உள்ளூர் விடுமுறை அறிவிக்கப்பட்டு விழா கோலாகலமாக நடைபெற்று வருகிறது.

இதில் தஞ்சை பெருவுடையார் மற்றும் உலகமாதேவிக்கு அபிஷேக ஆராதனைகள் நடைபெற்றன. அதன் பின்னர், மாவட்ட ஆட்சியர் தினேஷ் பொன்ராஜ், காவல் கண்காணிப்பாளர் ரவளி பிரியா ஆகியோர் மாமன்னன் ராஜராஜ சோழன் சிலைக்கு மாலை அணிவித்தனர்.

அதன் பின்னர் பல்வேறு அரசியல் கட்சிகள் சார்பாக ராஜராஜ சோழன் மற்றும் உலகமாதேவி சிலைகளுக்கு மாலை அணிவித்து மரியாதை செலுத்தப்பட்டது. இதன் பின்னர் ராஜ அலங்காரத்துடன் ராஜராஜ சோழன் தஞ்சை முக்கிய பிரதான வீதிகளில் பவனி வரும் நிகழ்வு நடைபெறும்.