காங்கிரஸ் கட்சியுடன் முதலமைச்சர் பதவியை பகிர்ந்து கொள்ளும் திட்டம் ஏதுமில்லை : குமாரசாமி..

கர்நாடகாவில் காங்கிரஸ் கட்சியுடன் சுழற்சி முறையில் முதலமைச்சர் பதவியை பகிர்ந்து கொள்ளும் திட்டம் ஏதுமில்லை என குமாரசாமி தெரிவித்துள்ளார்.

காங்கிரஸ் ஆதரவுடன் வரும் புதன்கிழமை கர்நாடக முதலமைச்சராக குமாரசாமி பதவியேற்க உள்ளார். கர்நாடக காங்கிரஸ் கமிட்டி தலைவர் பரமேஸ்வரா துணை முதலமைச்சராக பதவி ஏற்க உள்ளதாக கூறப்படுகிறது. மேலும், கர்நாடக அமைச்சரவையில் குமாரசாமியின் மதச்சார்பற்ற ஜனதா தள கட்சிக்கு 20 அமைச்சர் பதவிகளும், காங்கிரஸ் கட்சிக்கு 18 அமைச்சர் பதவிகளும் ஒதுக்க ஒப்பந்தம் செய்யப்பட்டிருப்பதாக தகவல் வெளியாகியுள்ளது. கடந்த 2007ஆம் ஆண்டு பாஜகவுடன் சுழற்சி முறையில் முதலமைச்சர் பதவியை பரிமாறிக் கொள்ளும் நிபந்தனையுடன் குமாரசாமி முதலமைச்சர் பதவி வகித்தார்.

ஆனால், குமாரசாமி அதிகாரப் பகிர்வு ஒப்பந்தத்தை மீறிவிட்டதாகக் கூறிய பாஜக, 20 மாதங்களில் ஆதரவை வாபஸ் பெற்றதால், குமாரசாமி ஆட்சி கவிழ்ந்தது. இருப்பினும், தற்போது நிபந்தனையற்ற ஆதரவு தந்துள்ள காங்கிரஸ் கட்சியுடன் முதலமைச்சர் பதவியை சுழற்சி முறையில் பகிர்ந்து கொள்ள குமாரசாமி திட்டமிட்டதாக கூறப்பட்டது. இந்நிலையில், பெங்களூரில் செய்தியாளர்களைச் சந்தித்த குமாரசாமி, முதலமைச்சர் பதவியை சுழற்சி முறையில் காங்கிரஸ் கட்சியுடன் பகிர்ந்து கொள்ளும் திட்டம் ஏதுமில்லை என விளக்கம் அளித்தார். மேலும் காங்கிரஸ் கட்சி ஆதரவுடன் 5 ஆண்டுகள் முழுமையாக முதலமைச்சர் பதவியில் நீடிக்கவுள்ளதாகவும் குமாரசாமி நம்பிக்கை தெரிவித்தார்.

காங்கிரஸ் கட்சித் தலைவர் ராகுல்காந்தி மற்றும் சோனியா காந்தியை சந்திப்பதற்காக நாளை காலை டெல்லி செல்லவுள்ளதாக அவர் கூறினார். புதன்கிழமை பதவியேற்றதும், வியாழக்கிழமையே பெரும்பான்மையை நிரூபிக்கப்போவதாகவும் குமாரசாமி தெரிவித்தார்.