#AUSvPAK : அதிரடி ஆட்டம் காட்டி பாகிஸ்தானை வீழ்த்தி ஃபைனலுக்குள் நுழைந்தது ஆஸ்திரேலியா.!

177 எனும் கடின இலக்கை 19 ஓவரிலேயே எட்டி பிடித்து பாகிஸ்தானை வீழ்த்தி ஆஸ்திரேலிய அணி ஃபைனலுக்குள் நுழைந்தது.

டி20 உலக கோப்பை தொடரில் இன்றைய ஆட்டத்தில் அரையிறுதியில் பாகிஸ்தான் அணியும் ஆஸ்திரேலிய அணியும் மோதின. இதில் வெற்றிபெறும் அணி நியூசிலாந்து அணியுடன் இறுதி போட்டியில் மோதும். இந்த போட்டியில் முதலில் பேட் செய்த பாகிஸ்தான் அணி 20 ஓவரில் 4 விக்கெட் இழந்து 176 ரன்கள் எடுத்து இருந்தது. இதில் அதிகபட்சமாக ரிஸ்வான் 67 ரன்கள் எடுத்து இருந்தார். ஃபகார் சமான் 55 ரன்கள் எடுத்து கடைசி வரை ஆட்டமிழக்காமல் இருந்தார். கேப்டன் பாபர் அசாம் 39 ரன்கள் எடுத்திருந்தார்.

ஆஸ்திரேலியா அணி சார்பாக ஸ்டார்க் 2 விக்கெட்டுகளும், கம்மின்ஸ், சாம்பா ஆகியோர் தலா ஒரு விக்கெட்டும் வீழ்த்தினர்.

20 ஓவரில் 177 ரன்கள் எடுத்தால் வெற்றி என்ற இலக்குடன் களமிறங்கிய ஆஸ்திரேலிய அணிக்கு தொடக்கத்திலேயே அதிர்ச்சி காத்திருந்தது. கேப்டன் பின்ச் முதல் பந்தில் LBW முறையில் ஆட்டம் இழந்தார். ஆனால், இன்னொரு தொடக்க ஆட்டக்காரரான வார்னர் நிதானமாக விளையாடி 49 ரன்கள் சேர்த்து ஆட்டமிழந்தார். மிச்செல் மார்ஸ் 28 ரன்களும், ஸ்டீவன் ஸ்மித் 5 ரன்களுக்கும் மேக்ஸ்வெல் 7 ரன்களுக்கும் ஆட்டமிழந்தனர். அடுத்தடுத்த முதன்மை வீரர்கள் ஆட்டமிழந்ததால் அந்த சமயம் பாகிஸ்தான் அணிதான் வெற்றி பெறும் சூழல் ஏற்பட்டிருந்தது.

ஆனால், அதன் பிறகு களமிறங்கிய ஸ்டோனிஸ் மற்றும் மேத்யூ வாடே ஆகியோர் அதிரடியாக விளையாடி அணியை வெற்றிப்பாதைக்கு அழைத்துச் சென்றனர். அதிலும் மேத்யூ வாடே 17 பந்தில் 2 பவுண்டரிகள், 4 சிக்ஸர்கள் அடித்து 41 ரன்கள் விளாசி அணியை வெற்றி பெற செய்தார். ஸ்டோனிஸ் தனது பங்கிற்கு 31 பந்துகளில் 40 ரன்கள் விளாசி இருந்தார்.

இறுதியில் 19 ஓவர் முடிவிலேயே 177 எனும் கடின இலக்கை எளிதில் எட்டி ஃபைனலுக்கு சென்றது ஆஸ்திரேலிய அணி.

பாகிஸ்தான் அணி சார்பாக சதாப் கான் 4 ஓவர் வீசி 4 விக்கெட்டுகளை வீழ்த்தி இருந்தார். சாகின் அப்ரிடி ஒரு விக்கெட் வீழ்த்தி இருந்தார்.

வரும் ஞாயிற்று கிழமை (நவம்பர் 14) அன்று துபாயில் நடக்கும் இறுதி போட்டியில் நியூசிலாந்து அணியும் ஆஸ்திரேலிய அணியும் பலபரிட்சை நடத்த உள்ளன.