சேலத்தில் சகோதரியை மருத்துவமனைக்கு அழைத்து சென்ற இளைஞர் – அதிரவைத்த சம்பவம்..!

சேலத்தில் தனது சகோதரியை காப்பாற்றுவதற்காக மருத்துவமனைக்கு காரில் வேகமாக சென்ற இளைஞர் பல சாலை தடுப்புகளை இடித்து தள்ளியது அந்த பகுதியில் பரபரப்பை ஏற்படுத்தியுள்ளது.

சேலத்தில் அஜித்குமார் என்ற இளைஞர் நரசோதிப்பட்டியை சேர்ந்தவர். இவர் ஒரு கட்டிட தொழிலாளர். இவரின் சகோதரிக்கு கொரோனா பாதிப்பு காரணமாக திடீரென்று மூச்சுத்திணறல் ஏற்பட்டுள்ளது. இதனால் சகோதரியை அழைத்துக்கொண்டு அவரது பலேனோ காரில் சேலம் மாவட்ட ஆட்சியர் அலுவலகத்திற்கு அருகில் இருக்கும் தனியார் மருத்துவமனைக்கு புறப்பட்டார். அப்போது, சகோதரியை அடிக்கடி கவனித்து கொண்டு காரை ஓட்டிய இவர், சற்றும் எதிர்பாராமல் சாலை ஓர கூம்பு வடிவ தடுப்புகள் மீது ஏற்றியுள்ளார். நிலைமையை கட்டுக்குள் கொண்டுவருவதற்குள் பல இரும்பு சாலை தடுப்புகளை இடித்து தள்ளிவிட்டார்.

அதனால், காரை நிறுத்தி காவல்துறையினரிடம் மருத்துவமனைக்கு செல்வதாக கூறி அனுமதி பெற்று சென்றுள்ளார். சகோதரியை மருத்துவமனையில் அனுமதித்த பிறகு, மீண்டும் காவல் துறையினரிடம் உண்மையை விளக்கி கூறியுள்ளார். பின்னர், இவரை அஸ்தம்பட்டி காவல்நிலையத்திற்கு அழைத்து சென்று விசாரணை நடத்தியதில் இவர் கூறியது உண்மை என்று தெரியவந்துள்ளது. பதற்றத்தில் நடந்த சம்பவம் என்பதால் காவல்துறையினரும் மனிதாபிமான அடிப்படையில் இவரை திருப்பியனுப்பினர். இச்சம்பவம் அப்பகுதியில் அதிர்ச்சியை ஏற்படுத்தியுள்ளது.