பொதுமக்களுக்கான விற்பனை நேரத்தை அரசு வரையறுக்க வேண்டும் – பெட்ரோல் விற்பனையாளர் சங்கம்

பெட்ரோல் நிலையங்களில் பொதுமக்களுக்கான விற்பனை நேரத்தை காலை 6 மணி முதல் நண்பகல் 12 மணிவரை அரசு வரையறுக்க வேண்டும்.

இந்தியா முழுவதும் கொரோனா வைரஸின் இரண்டாவது அலை தீவிரமாக பரவி வரும் நிலையில், இதனை கட்டுப்படுத்த பல மாநிலங்களில் முழு ஊரடங்கு அமல்படுத்தப்பட்டுள்ளது. அந்த வகையில், தமிழகத்தில் கொரோனா வைரஸ்  தீவிரமாக பரவி  வருவதால், அதனை கட்டுப்படுத்த தமிழக அரசு பல்வேறு முன்னெச்சரிக்கை நடவடிக்கைகளை மேற்கொண்டு வருகிறது.

அதன்படி கடந்த இரண்டு வாரங்களாக தளர்வுகளுடன் கூடிய பொது முடக்கம் அமலில் இருந்த நிலையில், நாளை முதல் தளர்வுகள் இன்றி ஒரு வாரத்துக்கு முழு ஊரடங்கு நீட்டிக்கப்பட்டுள்ளது. இந்த நிலையில், அரசு சில அத்தியாவசியமான தேவைகளுக்கு மட்டுமே அனுமதி அளித்துள்ளது. அந்த வகையில் பெட்ரோல் பங்குகள் வழக்கம் போல் இயங்கும் என அறிவிக்கப்பட்டுள்ளது.

இந்நிலையில், பெட்ரோல் விற்பனையாளர் சங்கம், அத்தியாவசிய வாகனங்களுக்கான நேரத்தைத் தவிர்த்து, பெட்ரோல் நிலையங்களில் பொதுமக்களுக்கான விற்பனை நேரத்தை காலை 6 மணி முதல் நண்பகல் 12 மணிவரை அரசு வரையறுக்க வேண்டும் என்று  தமிழக அரசுக்கு கோரிக்கை விடுத்துள்ளது.