தமிழகத்தில் 7 மாவட்டங்களை கோட்டையாக மாற்றிய திமுக..!

சென்னை, திருவள்ளூர், காஞ்சிபுரம், ராமநாதபுரம், திருச்சி, அரியலூர், பெரம்பலூர் ஆகிய 7 மாவட்டங்களில் உள்ள அனைத்து தொகுதிகளையும் திமுக  கைப்பற்றியுள்ளது.

தமிழகத்தில் நடைபெற்ற சட்டமன்ற தேர்தலில் திமுக கூட்டணியில் 159 இடங்களில் வெற்றி பெற்றுள்ளது. இதைத்தொடர்ந்து, வருகின்ற 7-ஆம் தேதி தமிழக முதல்வராக முக ஸ்டாலின் பொறுப்பேற்கவுள்ளார். இந்நிலையில், திமுக சென்னை, திருவள்ளூர், காஞ்சிபுரம், ராமநாதபுரம், திருச்சி, அரியலூர், பெரம்பலூர் ஆகிய 7 மாவட்டங்களில் உள்ள அனைத்து தொகுதிகளையும் கைப்பற்றியுள்ளது.

சென்னை மாவட்டத்தில் உள்ள 16 தொகுதிகளிலும், திருவள்ளூர் மாவட்டத்தில் உள்ள 10 தொகுதிகளிலும், காஞ்சிபுரத்தில் உள்ள 4 தொகுதியிலும், பெரம்பலூர் மற்றும் அரியலூர் மாவட்டத்தில் உள்ள தலா இரண்டு தொகுதிகளிலும், ராமநாதபுரம் மாவட்டத்தில் உள்ள 4  தொகுதிகளிலும், திருச்சி மாவட்டத்தில் உள்ள 9 தொகுதிகளிலும் திமுக வெற்றி பெற்று கைப்பற்றியது.

தலைநகர் சென்னையை ஒட்டியுள்ள திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் உள்ள 37 தொகுதிகளில் 36 தொகுதிகளில் திமுக கூட்டணி வெற்றி பெற்றுள்ளது. செங்கல்பட்டு மாவட்டத்தில் உள்ள 7 தொகுதிகளில் மதுராந்தகம் தொகுதியைத் தவிர மற்ற 6 தொகுதிகளில் திமுக வெற்றி பெற்றுள்ளது.

கடந்த 2016-ம் ஆண்டு தேர்தலில் பெரம்பலூர் மற்றும் அரியலூர் மாவட்டத்தில் அதிமுக வெற்றி பெற்றிருந்தது என்பது குறிப்பிடத்தக்கது.