#IPL2020: 168 ரன்கள் இலக்கு வைத்த சென்னை அணி..!

இன்றைய 29-வது போட்டியில் சன்ரைசர்ஸ் ஹைதராபாத் Vs சென்னை சூப்பர் கிங்ஸ் அணிகள் மோதி வருகிறது. இப்போட்டி துபாய் சர்வதேச மைதானத்தில் நடைபெறுகிறது. இந்த போட்டியில் டாஸ் வென்ற சென்னை அணி பேட்டிங் தேர்வு செய்தது.

சென்னை அணியின் தொடக்க வீரர்களாக ஷேன் வாட்சன் – டு பிளெசிஸ் கூட்டணி களமிறங்கும் என எதிர்பார்க்கப்பட்ட நிலையில், முதல்முறையாக வாட்சனுக்கு பதிலாக சாம் கரண் களமிறங்கினார். ஆட்டம் தொடக்கத்திலே டு பிளெசிஸ் டக் அவுட் ஆனார். இதைத் தொடர்ந்து, ஷேன் வாட்சன் களமிறங்கினார்.

சிறப்பாக விளையாடி வந்த சாம் கரண் 31 ரன் எடுத்து விக்கெட்டை இழந்தார். பின்னர், அம்பதி ராயுடு இறங்க வாட்சன் உடன் இணைந்து அணியின் எண்ணிக்கையை உயர்த்தினர். சிறப்பாக விளையாடி வந்த இருவரும் அரைசதம் அடிக்காமல் அம்பதி ராயுடு 41, வாட்சன் 42 ரன் எடுத்து வெளியேறினர். அடுத்து இறங்கிய தோனி 21 ரன்கள் எடுத்தார்.

இறுதியாக சென்னை அணி 20 ஓவர் முடிவில் 6 விக்கெட்டை இழந்து 167 ரன்கள் எடுத்தனர். ஹைதராபாத் அணி 168 ரன்கள் இலக்குடன் களமிறங்கவுள்ளது.