குட்கா விவகாரம் – பேரவை உரிமைக் குழு கூட்டம்

திமுக எம்.எல்.ஏக்களுக்கு உரிமை மீறல் குழு அனுப்பிய நோட்டீஸை உயர்நீதிமன்றம் ரத்து செய்திருந்த நிலையில் இன்று மீண்டும் பேரவை உரிமை மீறல் குழு கூட்டம் நடைபெற்று வருகிறது.

தமிழக சட்டப்பேரவைக்கு தடை செய்யப்பட்ட குட்கா பொருட்களை திமுக தலைவர் மு.க.ஸ்டாலின் உள்ளிட்ட எம்.எல்.ஏக்கள் எடுத்து சென்றனர். அதற்கு எதிராக அவர்களுக்கு உரிமை மீறல் நோட்டீஸ் அனுப்பப்பட்டது. அதனை, எதிர்த்து திமுக தலைவர் மு.க ஸ்டாலின் உட்பட 21 எம்எல்ஏக்கள் உயர் நீதிமன்றத்தில் வழக்கு தொடர்ந்தனர்.

 உரிமை மீறல் நோட்டீஸை எதிர்த்து மு.க.ஸ்டாலின் உள்பட 21 எம்.எல்.ஏக்கள் தொடர்ந்த வழக்கு விசாரணைக்கு வந்தது.அதில், ‘ குட்கா உரிமை மீறல் நோட்டீஸ் ‘ரத்து செய்யப்படுவதாக உயர்நீதிமன்றம் உத்தரவு பிறப்பித்தது. மேலும் உரிமை மீறல் நோட்டீஸ் அனுப்பியதில் சில குறைபாடுகள் உள்ளதால் மீண்டும் உரிமை மீறல் நோட்டீஸ் அளிக்க வேண்டும் என்று தெரிவித்தது நீதிமன்றம்.

இந்நிலையில் திமுக எம்.எல்.ஏக்களுக்கு உரிமை மீறல் குழு அனுப்பிய நோட்டீஸை உயர்நீதிமன்றம் ரத்து செய்திருந்த நிலையில் இன்று மீண்டும் பொள்ளாட்சி ஜெயராமன் தலைமையில் பேரவை  உரிமை மீறல் குழு கூட்டம் கூடியுள்ளது.தலைமை செயலகத்தில் நடைபெற்று வரும் கூட்டத்தில் திமுக எம்.எல்.ஏக்கள் ஆஸ்டின் ,ரகுபதி உள்ளிட்டோர் பங்கேற்றுள்ளனர்.