தமிழக அரசு ஹெச்.ராஜா மீது கிரிமினல் வழக்கு தொடுக்க வேண்டும்!

திராவிடர் இயக்கத் தமிழர் பேரவை பொதுச்செயலாளர் சுப.வீரபாண்டியன் லெனின் இந்தியாவுடன் தொடர்பற்றவர் என்பதை விட அறியாமை வேறு என்ன இருக்க முடியும் என கேள்வி எழுப்பியுள்ளார்.

சுப.வீரபாண்டியன் சென்னை விமான நிலையத்தில், பாஜக ஆட்சிக்கு வந்தால் பெரியார் சிலையை உடைப்போம் என பாஜக தேசிய செயலாளர் ஹெச்.ராஜா தெரிவித்தது குறித்து பேட்டியளித்தார்.

“லெனின் மாபெரும் சிந்தனையாளர். உலகத்தலைவர்களுள் ஒருவர். லெனின் இந்தியாவுடன் தொடர்பற்றவர் என்பதை விட அறியாமை வேறு என்ன இருக்க முடியும்? தொலைபேசியை கண்டுபிடித்தவருடன் இந்தியாவுக்கு என்ன தொடர்பு? தாமஸ் ஆல்வா எடிசனுக்கும் இந்தியாவிற்கும் என்ன நேரடி தொடர்பு?” என்று கேள்வி எழுப்பினார்.

“இவர்கள் போக்கை இனி அனுமதிக்க முடியாது. வன்முறை போக்கை தூண்டிக் கொண்டிருந்தால் தமிழக அரசு கிரிமினல் வழக்கு தொடுக்க வேண்டும்.
பாஜக நியாயமான கட்சியாக இருந்தால் ஹெச்.ராஜா மீது நடவடிக்கை எடுக்க வேண்டும். இப்படி ஒருவரை பேசவிட்டுவிட்டு வேடிக்கை பார்ப்பது அதை மறைமுகமாக அவர்களுக்கும் உடன்படுவது என்றுதான் போன்றதாகும்.” என்று அவர் குற்றம்சாட்டினார்.

“ஹெச்.ராஜாவை பேச வைத்துவிட்டு வேடிக்கைப் பார்ப்பது. அவரது சொந்தக் கருத்து என்று சொல்வதைத் தவிர அவமானமான செய்தி வேறு எதுவும் இல்லை. பாஜக நடவடிக்கை எடுக்கிறதா என்பதைப் பற்றி கவலை இல்லை. தமிழக அரசு உடனடியாக நடவடிக்கை எடுக்க வேண்டும்.” என்று சுப.வீ வலியுறுத்தினார்.

“யாரோ ஒருவர் பேசுகிறார் என்று விட்டுவிட்டு போக முடியாது. பெரியாரின் உயர்ந்த கோட்பாடுகளை ஏற்றுக்கொள்கிறவர்கள் இதை எதிர்க்க வேண்டும். நாளை காலை 11 மணிக்கு சென்னை சிம்சன் பெரியார் சிலைக்கு அருகில் நின்று எதிர்ப்பை பதிவுசெய்ய வேண்டும் என்று திராவிட இயக்கத்தினர், சமூகநீதி கோட்பாட்டாளர்கள், கட்சித் தலைவர்கள் மாணவர்களுக்கு அழைப்பு விடுக்கிறோம்” என்றும் அவர் தெரிவித்தார்.

“இப்போது இருக்கும் அரசு பெரியாரை போற்றி வந்திருக்கும் அரசுதான். போராட்டத்திற்கு அனுமதி தரவேண்டும். இதை விளையாட்டாக விட்டுச் செல்லமுடியாது. இதற்கு ஒரு முற்றுப்புள்ளி வைக்க வேண்டும். தமிழகத்தில் வன்முறையை வளர அனுமதிக்க மாட்டோம். சட்டம் ஒழுங்கு கெடுவதற்கு துணை போகமாட்டோம். சட்டம் ஒழுங்கை காப்பாற்றுவோம்.” என சுப.வீரபாண்டியன் வலியுறுத்தினார்.

மேலும் செய்திகளுக்கு தினச்சுவடுடன் இணைந்திருங்கள்.