தீவிரமடைகிறது விசாரணை!அமலா பால் விவகாரம் பின்னணியில் யார்?

நடிகை அமலா பாலுக்கு  சென்னையில் பாலியல் தொல்லை கொடுத்த வழக்கில் திரை துறையை நேர்ந்த முக்கிய நபர் பின்னணியில் இருக்கலாம் என சந்தேகம் எழுந்துள்ளது. இது குறித்து கைதான அழகேசனின் செல்போனுக்கு வந்த அழைப்பு பட்டியலை வைத்து விசாரணையை தீவிரப்படுத்தியுள்ளனர்.

தமிழ், மலையாள திரையுலகில் முன்னணி நடிகையான அமலா பால், புதன் கிழமை மாலை சென்னை மாம்பலம் காவல் நிலையத்தில் பரபரப்பு புகார் அளித்தார். அவர் கொடுத்த புகாரில் விசாரணை நடத்திய போலீசார் அடுத்த அரை மணி நேரத்தில் அழகேசன் என்ற நபரை கைது செய்தனர். கைது செய்யப்பட்ட அழகேசனிடம் நடத்திய விசாரணையில் அவர் கொடுத்த வாக்குமூலம் காவல் துறையினருக்கு பல்வேறு சந்தேகத்தை ஏற்படுத்தியுள்ளது.

கைதான அழகேசன் தனது வாக்குமூலத்தில், பல்லாவரத்தை சேர்ந்த பாஸ்கர் என்பவர் தன்னை தொடர்பு கொண்டு நடிகை அமலா பாலை சந்திக்குமாறு கூறியதாக தெரிவித்துள்ளார். இதற்காக ஒரு தொகையை தனக்கு தருவதாக பாஸ்கர் சொன்னதால் தான் அமலா பாலை சந்தித்ததாகவும், அவர் இருக்கும் இடத்தையும் பாஸ்கர் என்பவரே சொன்னதாக போலீசாரிடம் அழகேசன் கூறியுள்ளார்.

மலேசியாவில் நடை பெறவுள்ள பெண்கள் தொடர்பான நிகழ்ச்சி ஒன்றில் கலந்து கொள்ளவிருந்த அமலா பால், அதற்கான நடன ஒத்திகைக்கு தான் சம்பவம் நடந்த அந்த நடன பள்ளிக்கு வந்திருந்தார். மலேசியாவில் நடைபெறும் அந்த நிகழ்ச்சி முடிந்த பின்னர் இப்ராகிம் என்ற தொழிலதிபருடன் நடிகை அமலா பாலுக்கு தனி விருந்துக்கு ஏற்பாடு செய்யப்பட்டுள்ளதாகவும், அதை நேரில் சென்று உறுதிபடுத்தி கொள்ளவே தன்னை பல்லாவரம் பாஸ்கர் அனுப்பியதாகவும் அழகேசன் தனது வாக்குமூலத்தில் கூறியுள்ளார். ஆனால் அந்த பாஸ்கர் யார்? அவர் வீடு எங்கிருக்கிறது என்ற விவரம் தனக்கு தெரியாது என கூறியதால் அழகேசன் கூறியதில் உண்மை இருப்பதாக தெரியவில்லை என போலீசார் தெரிவித்துள்ளனர். அழகேசன் செல்போனுக்கு வந்த அழைப்பை தெரிந்து கொள்ள முயன்றால் தனது செல்போன் அமலா பால் உதவியாளர்கள் தாக்கியதில் தொலைந்து விட்டதாக கூறியுள்ளார்.

இதனால் குழப்பம் அடைந்த போலீசார் அழகேசன் செல்போன் எண்ணிற்கு வந்த அழைப்புகளை சைபர் கிரைம் போலீசார் உதவியுடன் பட்டியலிட்டு விசாரணை மேற்கொண்டுள்ளனர். நடிகை அமலா பால் நடன பள்ளிக்கு வரும் தகவல், அவர் மலேசிய நிகழ்ச்சியில் கலந்து கொள்ளும் தகவல் இவை எல்லாம் கைதான அழகேசனுக்கு தெரிவித்தது யார் என விசாரணை நடக்கிறது. அதே வேளையில், அந்த பின்னணியில் உள்ள நபர் திரை துறையை சேர்ந்தவராக, அமலா பாலுக்கு தெரிந்தவராகவே இருக்கலாம் என வலுவான சந்தேகமும் எழுந்துள்ளது.

மேலும் செய்திகளுக்கு தினச்சுவடுடன் இணைந்திருங்கள்.