ஸ்ட்ராடோஸ்பெரிக் பலூனிங் நிறுவனமான வேர்ல்ட் வியூ நிறுவனம், பலூன்களைப் பயன்படுத்தி பயணிகளை விண்வெளி சுற்றுலாப் பயணம் அழைத்துச் செல்ல திட்டமிட்டுள்ளது.
நவீனத்தை நோக்கிய வளர்ச்சியில் விண்வெளி சுற்றுலா பயணம் என்பது சாத்தியமாகி வருகிறது.அந்த வகையில்,உலகின் முதல் விண்வெளி சுற்றுலா பயணம் மேற்கொண்டநிறுவனம் என்ற பெருமையை திகதி ரிச்சர்ட் பிரான்சனின் விர்ஜின் கேலக்டிக் நிறுவனம் அடைந்தது. இதனையடுத்து,அமேசான் நிறுவனர் ஜெப் பெஸோஸ் தனது ப்ளூ ஆரிஜின் நிறுவனத்திலிருந்து முதல் விண்வெளிச் சுற்றுலாவை வெற்றிகரமாக நிறைவு செய்தார்.
அதன்பின்னர்,உலக பெரும் பணக்காரர்களில் ஒருவரான எலான் மஸ்கின் ஸ்பேஸ் எக்ஸ் நிறுவனம், கடந்த செப்டம்பர் மாதம் 4 பேரை கட்டண அடிப்படையில் மூன்று நாள் சுற்றுப்பயணமாக விண்வெளிக்கு அனுப்பி வெற்றிகரமாக திரும்பியது.இன்ஸ்பிரேஷன் 4 என்று பெயரிடப்பட்ட இந்த விண்வெளி பயணத்தில், அமெரிக்காவின் பெரும் பணக்காரரும், ஷிப்ட் 4 பேமண்ட்ஸ் நிறுவனத் தலைவருமான, ஜாரிட் ஐசக்மென் தலைமையிலான 4 பேர் பயணம் செய்தனர்.
இந்நிலையில்,அரிசோனாவைச் சேர்ந்த ஸ்ட்ராடோஸ்பெரிக் பலூனிங் நிறுவனமான வேர்ல்ட் வியூ(stratospheric ballooning company),பலூன்களைப் பயன்படுத்தி பயணிகளை விண்வெளி விளிம்பிற்கு அழைத்துச் செல்ல திட்டமிட்டுள்ளது. அதன்படி,8 பார்வையாளர்கள் மற்றும் இரண்டு நிறுவன குழு உறுப்பினர்கள் உள்ளிட்டவர்களை பூஜ்ஜிய அழுத்த அடுக்கு மண்டல பலூனில் ஏற்றி, 1,00,000 அடி உயரத்திற்கு, ஏறக்குறைய 27 கிமீ தொலைவுக்கு அழைத்துச்சென்று விண்வெளியில் 6 முதல் 12 மணி நேரம் பயணம் மேற்கொள்ளவுள்ளது.
இந்த விண்வெளி பயணத்தில் பயன்படுத்தப்படும் விண்வெளி காப்ஸ்யூல் பலூன் விமானத்தில் உணவு, இணைய தரவு இணைப்பு, எர்த்-வியூ கேமராக்கள் மற்றும் நட்சத்திர பார்வை தொலைநோக்கிகள் மற்றும் தனிப்பட்ட பார்வைத் திரைகள் ஆகிய வசதிகள் கிடைக்கும்.இதில் பயணம் செய்ய ஒரு இருக்கைக்கு ரூ.37.56 லட்சம் (50,000 டாலர்) கட்டணமாக செலுத்த வேண்டும்.
நிறுவனத்தின் முதல் வணிக விமானப் பயணம் 2024 ஆம் ஆண்டின் தொடக்கத்தில் தொடங்கப்பட உள்ளன.இதற்காக,கிராண்ட் கேன்யன் தேசிய பூங்கா அதன் முதல் விண்வெளித் துறைக்கான இடமாக தேர்வாகும் என்று கூறப்படுகிறது.
