சிகப்பு ரோஜாக்கள் – 2 உருவாகிறதா.? விளக்கமளித்த பாரதிராஜா மகன்.!

சிகப்பு ரோஜாக்கள் படத்தின் இரண்டாம் பாகம் உருவாக்கவுள்ளதாக வெளியான தகவல்கள் வதந்தி என்று மனோஜ் விளக்கமளித்துள்ளார்.

பாரதிராஜா இயக்கத்தில் கமல்ஹாசன் மற்றும் ஸ்ரீதேவி நடிப்பில் வெளியான திரைப்படம் ‘சிகப்பு ரோஜாக்கள்’. இளையராஜா இசையமைத்த திரில்லர் கலந்த இந்த படம் அந்த காலத்திலையே அனைவரையும் மிரள வைத்து பெரும் வெற்றியை பெற்றிருந்தது. இந்த நிலையில் தற்போது இந்த படத்தின் இரண்டாம் பாகத்தை எடுக்க முடிவு செய்துள்ளதாக சில தகவல்கள் வெளியானது.

ஆம் சிகப்பு ரோஜாக்கள் படத்தின் இரண்டாம் பாகத்தை பாரதிராஜாவின் மகனான மனோஜ் இயக்கவுள்ளதாகவும், கமல் நடித்த கதாபாத்திரத்தில் சிம்பு அவர்களை நடிக்க வைக்க உள்ளதாகவும்,கீர்த்தி சுரேஷை நடிக்க வைப்பதற்கான பேச்சு வார்த்தை நடந்து வருவதாகவும்  தகவல்கள் வெளியானது. தற்போது இதுகுறித்து தனது டுவிட்டர் பக்கத்தில் பாரதிராஜாவின் மகனும் , நடிகருமான மனோஜ் விளக்கமளித்துள்ளார்.

அதில் சில நாட்களாக சமூக வலைத்தளங்களில் சிகப்பு ரோஜாக்கள் – 2 குறித்து வெளியாகியுள்ள செய்திகள் அனைத்தும் வதந்தி என்றும், ஒருவேளை படத்தை இயக்குவது குறித்து யோசித்தால் கண்டிப்பாக நானும், எனது அப்பாவும் இணைந்து அதிகாரப்பூர்வமாக அறிவிப்போம் என்றும் கூறியுள்ளார். இதிலிருந்து சிகப்பு ரோஜாக்கள் படத்தின் இரண்டாம் பாகத்தை எடுக்க போவதாக வெளியான தகவல்கள் வதந்தி என்று உறுதி செய்யப்பட்டுள்ளது.