'டிரைவர் இல்லாமலேயே கார் ஓடுது'... அடுத்த நொடியே நடந்த அதிர்ச்சி சம்பவம்!

பாகிஸ்தான் : நாடாளுமன்றக் கட்டடத்திற்குப் பக்கத்தில் இருக்கும் ஒரு முக்கிய சாலையில், ஓட்டுநர் இல்லாத அதிநவீன காரின் செயல்விளக்கப் பரிசோதனை நடந்தது. இதை உலகிற்குப் பிரமாதமாகக் காட்ட நினைத்த முகமது அலிஜா என்ற பாகிஸ்தான் பத்திரிகையாளர், காரின் முன் இருக்கையில் (முன்பக்கப் பயணியர் சீட்) அமர்ந்து கொண்டு போனில் வீடியோ எடுத்தார். "பாருங்கள், டிரைவர் இல்லாமலேயே கார் எவ்வளவு அழகாக முன்னோக்கிப் போகிறது" என அவர் பேசிக்கொண்டே இருக்கும்போதே, கார் திடீரென அவுட் ஆஃப் கண்ட்ரோல் ஆனது. அங்கே ஓரமாக நிறுத்தப்பட்டிருந்த போலீஸ் வேனை நோக்கி நேராகப் பாய்ந்தது.

இந்த கார் உள்ளே இருக்கும் ஆட்களால் ஓட்டப்படவில்லை. மாறாக சாட்டிலைட் மற்றும் இன்டர்நெட் உதவியோடு வெளியிலிருந்து ஒரு ஆபரேட்டரால் ரிமோட் கண்ட்ரோல் மூலம் இயக்கப்பட்டது. ஆனால் திடீரென ஏற்பட்ட சிக்னல் கோளாறால் கார் கட்டுப்பாட்டை இழந்தது. போலீஸ் வண்டியில் மோதப் போவதை வீடியோவிலேயே பார்த்த பத்திரிகையாளர் பதறிப்போய், காரை நிறுத்த அதன் ஹேண்ட்பிரேக்கை (Handbrake) சடாரென இழுத்துப் பார்த்தார். ஆனால் அதற்குள் கார் 'டமார்' என்று போலீஸ் வேன் மீது மோதி நின்றது. நல்லவேளையாக காரின் வேகம் குறைவாக இருந்ததால் யாருக்கும் எந்தக் காயமும் ஏற்படவில்லை, வண்டிகளுக்கு மட்டுமே லேசான அடி விழுந்தது.

அமெரிக்காவில் 'வேமோ' மற்றும் 'டெஸ்லா' நிறுவனங்களும், சீனாவில் 'பைடு' நிறுவனமும் இதுபோல டிரைவர் இல்லாத ரோபோடாக்ஸி (Robotaxi) மற்றும் நவீன ரகக் கார்களை ஏற்கனவே நகர வீதிகளில் ஓட்டிச் சாதித்து வருகின்றன. பல நூறு சென்சார்கள், கேமராக்கள் மற்றும் அதிநவீன சாஃப்ட்வேர்கள் மூலம் இந்த கார்கள் இயக்கப்படுகின்றன.

என்னதான் தொழில்நுட்பம் வளர்ந்தாலும், சாலையில் திடீரென நடக்கும் எதிர்பாராத திருப்பங்களை மனித மூளையைப் போலச் சுயமாகக் கணித்து முடிவெடுப்பது இந்த ஓட்டுநர் இல்லாத கார்களுக்கு இன்னும் ஒரு மிகப்பெரிய சவாலாகத்தான் இருக்கிறது என்பதை இந்த பாகிஸ்தான் 'லைவ் டெமோ' விபத்து உலகிற்கு நிரூபித்துக் காட்டியுள்ளது.