சென்னை : தமிழக சட்டப்பேரவையில் 110 விதியின் கீழ் முதலமைச்சர் விஜய் அவர்கள் பொதுமக்களின் நலன் கருதி போக்குவரத்துத் துறையில் மிக முக்கியமான ஒரு புதிய அறிவிப்பை வெளியிட்டுள்ளார். இதன்படி ஓட்டுநர் உரிமம் மற்றும் வாகனப் பதிவுச் சான்றிதழ் போன்ற ஆவணங்களை இனி பொதுமக்கள் மிகவும் எளிமையாக ஆன்லைனிலேயே பதிவிறக்கம் செய்து கொள்ளலாம் என்ற புதிய நடைமுறை வரும் செப்டம்பர் 15ஆம் தேதி முதல் மாநிலம் முழுவதும் அமலுக்கு வரவுள்ளது.
டிஜிட்டல் ஓட்டுநர் உரிமம்
பொதுவாக ஓட்டுநர் உரிமம் பெறுவதற்காக ஆர்.டி.ஓ அலுவலகத்தில் தேர்வு எழுதி தேர்ச்சி பெற்ற பிறகு, அச்சிடப்பட்ட அட்டை கைக்கு வருவதற்குப் பல நாட்கள் வரை காத்திருக்க வேண்டிய நிலை இதுவரை இருந்து வந்தது. ஆனால் இனிமேல் அந்த நிலை முற்றிலும் மாறப்போகிறது. புதிய அறிவிப்பின்படி ஓட்டுநர் தேர்வில் தேர்ச்சி பெற்ற விண்ணப்பதாரர்களுக்கு அன்றைய தினமே ஆன்லைன் மூலமாக டிஜிட்டல் ஓட்டுநர் உரிமம் அதாவது மின்னணு ஓட்டுநர் உரிமம் உடனடியாக வழங்கப்பட்டு விடும். இந்த வசதி வரும் செப்டம்பர் 15ஆம் தேதி முதல் தமிழகம் முழுவதும் முழுமையாகச் செயல்பாட்டுக்கு வரவுள்ளது.
ஆன்லைன் டிஜிட்டல் ஆர்சி
புதிதாக பைக் அல்லது கார் வாங்கும் போது அதற்கான வாகனப் பதிவுச் சான்றிதழ் அட்டை (RC Card) வந்து சேர்வதற்குப் பொதுமக்கள் நீண்ட காலம் காத்திருக்க வேண்டிய சூழல் நிலவியது. இனிவரும் காலங்களில் புதிய வாகனம் வாங்குபவர்கள் தங்களுக்குரிய டிஜிட்டல் ஆர்சி சான்றிதழை இணையம் வழியாக மிகவும் எளிதாகப் பதிவிறக்கம் செய்து கொள்ளலாம். இதற்கான பிரத்யேக வசதியும் வரும் செப்டம்பர் 15ஆம் தேதி முதல் மாநிலம் முழுவதும் உள்ள அனைத்துப் பகுதிகளிலும் மக்கள் பயன்பாட்டிற்குக் கொண்டு வரப்பட உள்ளது.
எந்நேரமும் போக்குவரத்து
சேவைகள்பொதுமக்கள் தங்களின் சொந்த ஊர் அல்லது ஆவணங்களில் உள்ள முகவரிக்கு உட்பட்ட வட்டாரப் போக்குவரத்து அலுவலகங்களுக்கு (RTO) நேரில் சென்று தான் வாகனப் பதிவு அல்லது உரிமம் சார்ந்த பணிகளை மேற்கொள்ள வேண்டும் என்ற கட்டாயம் இனி இருக்காது. போக்குவரத்து சம்பந்தமான அனைத்து விதமான அலுவலக சேவைகளையும் பொதுமக்கள் தங்களின் இருப்பிடத்தில் இருந்தபடியே பெற்றுக்கொள்ளும் வகையில் எங்கு வேண்டுமானாலும் பதிவு மற்றும் உரிமம் செய்தல் என்ற புதிய நடைமுறை படிப்படியாக அமல்படுத்தப்பட உள்ளது. இதன் மூலம் மக்கள் தேவையில்லாமல் அரசு அலுவலகங்களுக்கு அலைவது முற்றிலும் தவிர்க்கப்படும்.
ஆவணங்கள் தொலைந்தால் கவலை வேண்டாம்
தங்களின் அசல் ஓட்டுநர் உரிமம் அல்லது ஆர்சி புத்தகம் தொலைந்து போனாலோ அல்லது மழையிலோ, வெள்ளத்திலோ நனைந்து சேதமடைந்தாலோ பொதுமக்கள் மிகவும் சிரமப்பட்டு வந்தனர். நகல் சான்றிதழ் பெறுவதற்குப் பல்வேறு நடைமுறைகளைப் பின்பற்ற வேண்டியிருந்தது. ஆனால் இந்த புதிய டிஜிட்டல் முறையினால் பொதுமக்கள் தங்களின் ஆவணங்கள் தொலைந்தாலோ அல்லது சேதமடைந்தாலோ இணையதளத்திற்குச் சென்று மீண்டும் அதனைப் பதிவிறக்கம் செய்து கொள்ளலாம். மேலும் தேவைப்பட்டால் அதனைத் தாங்களே அச்சிட்டும் பாதுகாப்பாக வைத்துக் கொள்ள முடியும் என்பது எளிய மக்களுக்குக் கிடைத்துள்ள மிகப்பொரிய நிம்மதியாகும்.