டெல்லி : இந்திய ஆட்டோமொபைல் சந்தையில் தற்போது மிகப்பெரிய மாற்றம் நிகழ்ந்து வருகிறது. இதுவரை எலக்ட்ரிக் கார்களின் விலை அதிகமாக இருந்ததால் நடுத்தர மக்களால் வாங்க முடியவில்லை. ஆனால், தற்போது சாதாரண நடுத்தரக் குடும்பத்தினரின் பட்ஜெட்டிற்கும் ஏற்ற வகையில், பெட்ரோல் செலவை மிச்சப்படுத்தவும் சுற்றுச்சூழலைப் பாதுகாக்கவுமான மலிவு விலை எலக்ட்ரிக் கார்களை முன்னணி நிறுவனங்கள் களமிறக்கியுள்ளன.
'கர்தேகோ' (CarDekho) மற்றும் 'கார்வாலே' (CarWale) போன்ற முன்னணி ஆட்டோமொபைல் தளங்களின் சமீபத்திய தரவுகளின்படி, குறைவான விலையில் அதிக மைலேஜ் மற்றும் ரேஞ்ச் வழங்கும் மூன்று சிறந்த எலக்ட்ரிக் கார்கள் இந்தியச் சந்தையில் பெரும் வரவேற்பைப் பெற்றுள்ளன. டாட்டா மோட்டார்ஸ் மற்றும் எம்ஜி மோட்டார் நிறுவனங்கள் இந்தியச் சாலைகளின் சூழலுக்கு ஏற்ப உருவாக்கியுள்ள அந்த மூன்று கார்களின் முழு விவரங்களை பற்றி பார்ப்போம்.
டாடா டியாகோ இவி (Tata Tiago EV)
பட்ஜெட் சந்தையில் மிகப்பெரிய தாக்கத்தை ஏற்படுத்தியுள்ள கார் டாட்டா டியாகோ இவி. பெட்ரோல் காரைப் போலவே தோற்றமளிப்பதால், முதல்முறையாக எலக்ட்ரிக் கார வாங்குவோருக்கு இது மிகவும் பரிச்சயமாகவும் வசதியாகவும் இருக்கும்.
விலை விவரம்: இதன் ஆரம்ப எக்ஸ்-ஷோரூம் விலை ரூ. 6.99 லட்சம் ஆகும். இதுவே இந்தியாவின் மிகக் குறைந்த விலை முழு அளவிலான எலக்ட்ரிக் காராகும்.
பேட்டரி & மைலேஜ் ரேஞ்ச்:
19.2 kWh பேட்டரி மாடல்: ஒருமுறை சார்ஜ் செய்தால் 226 கி.மீ தூரம் வரை பயணிக்கலாம்.
24 kWh பேட்டரி மாடல்: நீண்ட தூரப் பயணங்களுக்கு உகந்த இந்த மாடல், ஒரே சார்ஜில் 285 கி.மீ மைலேஜ் தரும்.
சிறப்பு அம்சங்கள்: ஐந்து பேர் தாராளமாக அமரலாம். நல்ல பூட் ஸ்பேஸ் உண்டு. ஆட்டோமேட்டிக் கிளைமேட் கண்ட்ரோல், டச் ஸ்கிரீனுடன் கூடிய மியூசிக் சிஸ்டம் மற்றும் வண்டியை மெதுவாக்கும்போதே பேட்டரியைத் தாமாகவே சார்ஜ் செய்யும் பிரேக்கிங் சிஸ்டம் ஆகியவை இதில் உள்ளன. மேலும், பாதுகாப்பில் 4-ஸ்டார் ரேட்டிங் பெற்றுள்ளது குறிப்பிடத்தக்கது.
எம்ஜி காமெட் இவி (MG Comet EV)
நகரங்களின் கடுமையான போக்குவரத்து நெரிசல் மற்றும் பார்க்கிங் பிரச்சினைக்குத் தீர்வு காணும் வகையில் எம்ஜி நிறுவனம் முற்றிலும் மாறுபட்ட வடிவில் உருவாக்கியுள்ள அதிநவீன மைக்ரோ-கார் தான் இந்த எம்ஜி காமெட் இவி.
விலை விவரம்: இதன் ஆரம்ப எக்ஸ்-ஷோரூம் விலை ரூ. 7.50 லட்சம் ஆகும். இது முக்கியமாக நகர்ப்புற இளைஞர்களைக் குறிவைத்து உருவாக்கப்பட்டுள்ளது.
பேட்டரி & மைலேஜ் ரேஞ்ச்: இது 17.3 kWh பேட்டரி பேக்கைக் கொண்டுள்ளது. இலகுவான உடல் அமைப்பு கொண்டதால் ஹெவி டிராஃபிக்கிலும் பேட்டரி மிகத் திறமையாகச் செயல்பட்டு 230 கி.மீ வரை நம்பகமான மைலேஜ் தருகிறது.
சிறப்பு அம்சங்கள்: இது இரண்டு கதவுகளைக் கொண்ட சிறிய காராக இருந்தாலும், உள்ளே நான்கு பேர் வசதியாக உட்காரலாம். காரின் உள்ளே காட்ஜெட் போல தோற்றமளிக்கும் இரண்டு பிரம்மாண்டமான 10.25-இன்ச் திரைகள் கொடுக்கப்பட்டுள்ளன. நெடுஞ்சாலைகளில் வேகமாக சார்ஜ் செய்யும் வசதி இல்லாவிட்டாலும், வீட்டின் சாதாரண சாக்கெட்டிலேயே இரவு முழுவதும் சார்ஜ் போட்டால் சுமார் 6 மணி நேரத்தில் முழுமையாக சார்ஜ் ஆகிவிடும்.
டாட்டா பஞ்ச் இவி (Tata Punch EV)
கொஞ்சம் பெரிய கார், அதிக ரோடு பிரசென்ஸ் (Road Presence) மற்றும் நீண்ட தூரப் பயணங்களுக்கு ஏற்ற எலக்ட்ரிக் கார் விரும்புவோருக்கான பெஸ்ட் சாய்ஸ் இந்த டாடா பஞ்ச் இவி ஆகும்.
விலை விவரம்: இதன் ஆரம்ப எக்ஸ்-ஷோரூம் விலை ரூ. 9.69 லட்சம் ஆகும். மற்ற இரண்டு கார்களை விட விலை சற்று அதிகம் என்றாலும், இடவசதி, பவர் மற்றும் சொகுசு அம்சங்கள் இதில் அதிகம்.
பேட்டரி & மைலேஜ் ரேஞ்ச்
மிடியம் ரேஞ்ச் மாடல்: ஒருமுறை சார்ஜ் செய்தால் 260 கி.மீ தூரம் ஓடும்.
லாங் ரேஞ்ச் மாடல்: வார இறுதி வெளியூர்ப் பயணங்களுக்கு ஏற்ற வகையில், இது ஒரே சார்ஜில் 350 கி.மீ தூரம் வரை அசத்தலாகப் பயணிக்கும்.
சிறப்பு அம்சங்கள்: மேடான கிரவுண்ட் கிளியரன்ஸ் இருப்பதால் பள்ளம் மேடுகள் மற்றும் ஸ்பீடு பிரேக்கர்களில் சிரமமின்றி ஓட்டலாம். வென்டிலேட்டட் இருக்கைகள் (Ventilated seats), எளிதாக வண்டியை நிறுத்த 360-டிகிரி கேமரா மற்றும் பல ஏர்பேக்குகள் என பிரீமியம் வசதிகளுடன் வருகிறது.
இந்த மூன்று எலக்ட்ரிக் கார்களும், "பயணிக்க அதிக பணம் செலவழிக்காமல் நம்பகமான எலக்ட்ரிக் காரை வாங்கலாம்" என்ற நிலையை உருவாக்கியுள்ளன. அன்றாட சிட்டி பயன்பாட்டிற்கு டாடா டியாகோ இவி, பார்க்கிங் மற்றும் குறுகிய வீதிகளுக்கு எம்ஜி காமெட் இவி, மற்றும் நெடுஞ்சாலைப் பயணம் மற்றும் கரடுமுரடான சாலைகளுக்கு டாடா பஞ்ச் இவி எனப் பொதுமக்களுக்குச் சிறந்த தேர்வுகள் இப்போது கைவசம் உள்ளன. உங்களுடைய பட்ஜெட்டுக்கு எந்த கார் வாங்க விருப்பம் உள்ளதோ அதனை தேர்வு செய்து வாங்கிக்கொள்ளுங்கள்.