இன்று நான்கு மக்களவை,10 சட்டப்பேரவை தொகுதிகளில் நடைபெற்ற இடைத்தேர்தலின் வாக்கு எண்ணிக்கை காலை 8 மணிக்குத் தொடங்கி நடைபெற்று வருகிறது.

உத்தரப் பிரதேசத்தில் சில மாதங்களுக்கு முன்பு நடந்த இடைத்தேர்தலில் பாஜகவுக்கு பெரும் பின்னடைவு ஏற்பட்ட நிலையில் இன்று இடைத்தேர்தல் நடைபெறுகிறது. இந்த தேர்தல்களில் எதிர்கட்சிகள் ஒன்றுகூடி வேட்பாளர்களை நிறுத்தியுள்ளதால் பாஜகவுக்கு கடும் நெருக்கடி ஏற்பட்டுள்ளது.

உத்தரப்பிரதேசத்தின் கைரானா, மகாராஷ்டிராவில் பால்கர், பண்டாரா, கோண்டியா மற்றும் நாகாலாந்து மக்களவைத் தொகுதிகளின் வாக்கு எண்ணிக்கை நடைபெற்று வருகிறது.எதிர்க்கட்சிகள் ஓரணியில் திரண்டுள்ள நேரத்தில் மக்களவையில் மோடி அரசின் செல்வாக்கை இந்த இடைத்தேர்தல் முடிவுகள் தீர்மானிக்கும் என்று கருதப்படுகிறது. இதே போன்று கேரளா உள்ளிட்ட பல்வேறு மாநிலங்களின் பத்து சட்டமன்றத் தொகுதிகளின் இடைத் தேர்தல் முடிவுகளும் இன்று வெளியாகின்றன.

மார்ச் மாதத்திற்கு பிறகு பாஜக இரண்டாவது முறையாக உபியில் சவாலை சந்திக்கிறது. இந்த தேர்தலிலும் பாஜகவிற்கு எதிராக அனைத்து எதிர்கட்சிகளும் ஒன்றிணைந்து உள்ளனர். கடந்த இடைத்தேர்தலில் காங்கிரஸ் வேட்பாளரை நிறுத்தியது. ஆனால் இந்தமுறை சமாஜ்வாதி, பகுஜன்சமாஜ், ராஷ்டரீய லோக்தளம் கடசிகளுடன் காங்கிரஸ் கரம் கோர்த்துள்ளது. இதனால், கைரானாவும், நுபுர்பூரும் பாஜகவிற்கு மீண்டும் சவாலாகி உள்ளன.

மகாராஷ்டிராவின் பண்டாரா-கோண்டியாவில் சரத்பவாரின் தேசியவாத காங்கிரஸுக்கு ஆதரவளித்துள்ளது காங்கிரஸ். இங்கு பாஜகவை தோல்வியுற செய்யவதற்காக சிவசேனாவும் வேட்பாளரை நிறுத்தவில்லை.

மற்றொரு மக்களவை தொகுதியான பால்கரில் சிவசேனை பாஜகவை கடுமையாக எதிர்க்கிறது. இங்கு காங்கிரஸ் மற்றும் மார்க்சிஸ்டு கட்சியின் வேட்பாளர்களும் பலமாக உள்ளனர். இதனால், பால்கரில் நான்குமுனைப்போட்டி நிலவி பாஜகவிற்கு சிக்கல் ஏற்பட்டுள்ளது.

நாகாலாந்தின் ஒரே ஒரு மக்களவை தொகுதியின் எம்பியாக இருந்தவர், நாகாலாந்தின் மக்கள் ஜனநாயக் கட்சியின் தலைவரரான நிபியோ ரியோ. இவர், பாஜக ஆதரவுடன் அம்மாநில முதல்வராகி விட்டார்.

இதனால், நடைபெறும் இடைத்தேர்தலில் பாஜகவுடன் மக்கள் ஜனநாயகக்கட்சி இணைந்து தோக்கோ யப்தோமியை வேட்பாளராக நிறுத்தி உள்ளது. இதற்கு போட்டியாக காங்கிரஸ் ஆதரவுடன் நாகா மக்கள் முன்னணி சி.அபோக் ஜமீர் என்பவரை வேட்பாளராக்கி உள்ளது.

மேலும் செய்திகளுக்கு தினச்சுவடுடன் இணைந்திருங்கள்.