இலங்கை மகளிர் அணி ஆஸ்திரேலியாவில் சுற்றுப்பயணம் செய்து 3 டி20 மற்றும் 3 ஒருநாள் போட்டியில் விளையாடினார். இதில் நேற்று கடைசி மற்றும் 3-வது ஒருநாள் போட்டி பிரிஸ்பேனில் உள்ள ஆலன் பார்டர் புலம் மைதானத்தில் நடைபெற்றது.
இப்போட்டியில் இலங்கை அணி முதலில் பேட்டிங் செய்தது. 50 ஓவர் முடிவில் இலங்கை அணி 8 விக்கெட் 195 ரன்கள் எடுத்தனர்.196 ரன்கள் இலக்குடன் களமிறங்கிய ஆஸ்திரேலிய அணி 26.5 ஓவரில் ஒரு விக்கெட்டை இழந்து 196 ரன்கள் எடுத்து 9 விக்கெட் வித்தியாசத்தில் வெற்றி பெற்றது.
இதன் மூலம் ஆஸ்திரேலியா அணி 3 -0 என்ற கணக்கில் தொடரை கைப்பற்றியது. இதற்கு முன் விளையாடிய டி20 தொடரில் ஆஸ்திரேலியா 3 -0 என்ற கணக்கில் தொடரை கைப் பற்றியது என்பது குறிப்பிடத்தக்கது.
இந்நிலையில் ஆஸ்திரேலியா மகளிர் அணி கடந்த 2018-19 ஆகிய இரண்டு ஆண்டுகளில் இருந்து தொடர்ந்து 18 ஒருநாள் போட்டி வெற்றி பெற்று புதிய சாதனையை படைத்து உள்ளது.
கடந்த 2018 மார்ச் மாதம் இந்தியாவுக்கு எதிரான ஒருநாள் தொடரிலும் அதன் பின்னர் பாகிஸ்தான் , நியூசிலாந்து , இங்கிலாந்து , வெஸ்ட் இண்டீஸ் மற்றும் இலங்கை ஆகிய அணிகளுக்கு எதிராக தலா 3 போட்டிகளில் விளையாடி தொடர்ந்து 18 ஒருநாள் போட்டி வெற்றி பெற்று ஆஸ்திரேலியா மகளிர் அணி புதிய சாதனையை படைத்து உள்ளது.
இதற்கு முன் ஆஸ்திரேலியா மகளிர் அணி 1997 டிசம்பர் 12 முதல் 1999 பிப்ரவரி 7-ம் தேதி வரை தொடர்ந்து 17 ஒருநாள் போட்டிகளில் வெற்றி பெற்றதே சாதனையாக இருந்தது.
18- ஆஸ்திரேலியா(2018-19)*
17 – ஆஸ்திரேலியா (1997-99)
16 – ஆஸ்திரேலியா (1999-2000)
16 – இந்தியா (2016-17)
13 – இங்கிலாந்து (1989-91)
