இந்தியாவிலேயே அதிகம் பேர் பயணிக்கும் இரண்டாவது சுறுசுறுப்பான விமான நிலையமான மும்பையில், 65 விநாடிகளுக்கு ஒரு விமானம் என்ற வீதத்தில் விமானப் போக்குவரத்து நடைபெறுகிறது. இங்கு விமானம் புறப்பாடு மற்றும் வருகையின் நேரம் பெரும்பாலும் தாமதமாவதாக பயணிகள் குற்றம்சாட்டி வந்தனர். புறப்பாடு மற்றும் வருகையில் தாமதமாகும் வரிசையில் பனிமூட்டத்தால் அதிகளவு விமான சேவை ரத்தாகும் டெல்லி கூட 2-ம் இடத்திலேயே உள்ளது. பிற நகரங்களில் இருந்து வரும் இணைப்பு சேவை விமானம் தாமதம், பணிக்குழு மாறுதல், அதிகளவு விமானப் போக்குவரத்து, விமானம் தரையிறங்க போதிய இட வசதியின்மை உள்ளிட்டவையே மும்பையில் விமானங்கள் தாமதமாக காரணம் எனக் கூறப்படுகிறது. எனவே கடந்த 5 ஆண்டுகளில் மும்பை விமான நிலையத்தில் வருகை மற்றும் புறப்பாடு சுமார் 45 சதவீதம் வரை தாமதம் ஆவதாக விமான நிலைய இணைய தளத்தில் தெரிவிக்கப்பட்டுள்ளது.
